Улсын Их Хурлын хаврын чуулганаар иргэн, аж ахуйн нэгжүүдийн саналд үндэслэн татвар, нийгмийн даатгалын багц хуулийн өөрчлөлтийг өргөн барина. Үүнтэй холбогдуулан “Хүнсний хувьсгал” мэргэжлийн холбооны гишүүд үндэсний үйлдвэрлэгчдийн дуу хоолой болон ажиллах зорилготой долоон хүний бүрэлдэхүүнтэй ажлын хэсгийг байгуулсан. Тус ажлын хэсэг өнөөдөр/2025.03.20/ хуралдаж, хуулиуд тус бүрд оруулах бодлогын болон зохицуулалтын саналуудыг нэгтгэн цаашид хийж хэрэгжүүлэх арга хэмжээний төлөвлөгөөгөө боловсрууллаа.

Ажлын хэсгийн бүрэлдэхүүнд:

• Ажлын хэсгийн ахлагч Б.Мөнхзул /Удирдах зөвлөлийн гишүүн/

• Т.Мөнхтөр /Удирдах зөвлөлийн дэд тэргүүн/
• Л.Эрхэмбаяр /Удирдах зөвлөлийн гишүүн, тэргүүлэгч/
• Г.Энхбилэг /Удирдах зөвлөлийн гишүүн, тэргүүлэгч/
• Ц.Төгсөө /Удирдах зөвлөлийн гишүүн/
• Л.Баяртулга /Удирдах зөвлөлийн гишүүн/
• Б.Баярцэцэг /”Хүнсний хувьсгал” мэргэжлийн холбооны гүйцэтгэх захирал/

Өнөөдөр ажил олгогч 12.5 хувь, ажилтан 11.5 хувийн татварыг нийгмийн даатгалын шимтгэлд төлдөг. Тэгвэл дээрх хуулийн хүрээнд тус шимтгэлийг бууруулах аж. 

Ажлын хэсэг татварын хуулиудын хэрэгжилт, үр дүнд дүн шинжилгээ хийх, хуулийг хэрэгжүүлэх явцад гарч буй алдаа, зөрчилд иргэн, аж ахуйн нэгж, эрдэмтэн, судлаач, олон улсын байгууллагын саналыг сонсох замаар хэрэгжилт хангалтгүй, хэрэгжих боломжгүй хуулийн заалтуудад өөрчлөлт оруулах замаар татварын таатай орчныг бий болгох зорилготой ажиллаж байгааг онцлон тэмдэглэв.

Мөн татварын багц хуулиудын шинэчилсэн найруулга 2020 оноос мөрдөгдөж эхэлснээс хойш багагүй хугацаа өнгөрсөн. Аж ахуйн нэгжийн орлогын албан татварын хуулийн шинэчилсэн найруулгаар татварын хялбаршуулсан тогтолцоог бүрдүүлж:

• Жижиг, дунд бизнес эрхлэгчдийн үйл ажиллагааны цар хүрээнээс хамаарч татварын харилцааг нарийвчлан тогтоож,
• Татварын зорилгоор орлого хүлээн зөвшөөрөх зарчим, албан татвар ногдох орлогоос хасагдах зардалд тавигдах шаардлага, албан татвар ногдох орлогоос хасагдах хүүгийн зардлын дүрмийн шинэчилэл болон татварын хөнгөлөлт, чөлөөлөлт эдлүүлэх харилцааг боловсронгуй болгосон зэрэг бодлогын шинжтэй асуудлыг хуульчилж,
• Татварын орчинд тодорхой эерэг үзүүлэлт, дүн гарсан хэдий ч хуулийн зарим зохицуулалт нь татвар төлөгчид таатай бус, дарамт ихтэй, үр дүнгүй байгаа талаар холбогдох судалгаа болон иргэн, аж ахуй нэгжээс гаргаж буй санал, гомдлыг ирүүлсээр байгааг дурдлаа.