“Засгийн газар-Бүсчилсэн хөгжил” арга хэмжээ зохион байгуулахад ажиллах бэлтгэл ажлыг хангах хүрээнд Ерөнхийлөгчийн Тамгын газар, Хүнс, хөдөө аж ахуй, хөнгөн үйлдвэрийн яам, “Хүнсний хувьсгал” мэргэжлийн холбоо, Шинэ хоршоо хөдөлгөөн зэрэг байгууллагуудын төлөөлөл уулзалт хийж, санал солилцлоо. Тус ажлын хэсэг нь долоон бүсэд зохион байгуулагдах Бүсчилсэн хөгжлийн бодлоготой уялдуулан салбарын хөгжлийн төлөвлөгөөг боловсруулах, хуралдаан зохион байгуулах зорилготой байгуулагдсан юм.
Уулзалтад Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Ерөнхийлөгчийн Тамгын газрын Хүнсний төсөл, хөтөлбөрийн албаны дарга В.Мөнгөнсүх, ХХААХҮЯ-ны Бодлого, төлөвлөлтийн газрын шинжээч Д.Баярсайхан болон холбогдох албаныхан оролцлоо.
Бүсийн зөвлөлийн өргөтгөсөн хуралдааныг Монгол Улсын Засгийн газрын 2025 оны 01 дүгээр сарын 14-ний өдрийн хуралдааны 3 дугаар тэмдэглэлээр бүсийн аймгуудын үсгийн дарааллаар жил бүр ээлжлэн зохион байгуулахаар шийдвэрлэсэн. Хуралдаанд бүсээс сонгогдсон Улсын Их Хурлын гишүүд, Засгийн газрын гишүүд, төрийн захиргааны байгууллага, бүсийн аймаг, сумдын удирдлага, хувийн хэвшил, олон улсын байгууллага, орон нутгийн төр захиргааны байгууллага, эрдэмтэн, судлаачид, иргэдийн төлөөлөл оролцох юм.
Салбарын зорилтыг бүс нутгийн хөгжлийн асуудалтай уялдуулах үйл ажиллагааны хүрээнд дараах ажлуудыг зохион байгуулах юм.
- Бүсчилсэн хөгжлийн бодлоготой уялдуулан салбарын хөгжлийн төлөвлөгөөг боловсруулах, хуралдаан зохион байгуулах ажлын хэсэг байгуулна.
- Эдийн засгийн бүсчлэлийн ерөнхий бүдүүвчтэй уялдуулан салбарын бүсчлэл, байршлын бүдүүвчийг тогтоож салбарын зорилтыг бүс нутгийн хөгжлийн асуудалтай уялдуулах бодлого боловсруулна.
- Бүсийн үйлдвэрлэл, үйлчилгээ, дэд бүтцийн хөгжил, байршлыг зохицуулах зураглал бүхий илтгэл бэлтгэж танилцуулна.
- Салбар хуралдааны модератор, панелистийн асуулт, хариулт, логистик асуудлыг хариуцна.
- Салбар хуралдаанаас гарсан санал, зөвлөмжийг нэгтгэн “Бүсчилсэн хөгжлийн үндэсний хороо“-нд тайлагнана
Энэ хүрээнд Ерөнхийлөгчийн Тамгын газар болон ХХААХҮЯ-аас томилогдсон хоёр талын ажлын хэсэг бүс нутгуудад хийх Бүсийн зөвлөлийн өргөтгөсөн хуралдааны үеэр хамтарсан хурал зохион байгуулах ажлын төлөвлөгөөг баталлаа.
